Toshkent viloyati Chinoz tumanining “Sutbuloq” mahalla fuqarolar yigʻinida yashovchi Sobir aka Rahmonberdiyevlar xonadoni hozir koʻpchilikka ibrat koʻrsatmoqda.

Mahalla raisi Baxtigul Begaydarovaning taʼkidlashicha, 10 kun avval ushbu xonadonda karantin talablari asosida toʻy boʻlgani va bunda yosh kelin-kuyovlar kamxarjlikka amal qilgani tahsinga sazovor.

– Hududimizdagi fuqarolar mehnatkash, qariyb 90 foizdan ortigʻi tomorqadan katta daromad oladi. Shu bos, toʻq yashaydi. Bizda deyarli kam taʼminlangan oilalar yoʻq, – deydi mahalla raisi B.Begaydarova. – Sobir aka turmush oʻrtogʻi bilan halol mehnati tufayli 3 oʻgʻil va 1 qizni voyaga yetkazyapti. Ikki oʻgʻli, kelini oliy oʻquv yurti talabasi. Hovlisining 14 sotixi tomorqa boʻlib, uning bir qismida issiqxona barpo etilgan. Oilaning barcha aʼzolari bu yerda birdek mehnat qiladi. Ular bulgʻor qalampiri, bodring ekib, hosilni saranjomlab olib, endi navbat pomidorga.

– Bilganga tomorqa koni foyda ekan, – deydi Sobir aka. – Yerga mehr berib, ishlov berilsa, dasturxon toʻkin, roʻzgʻor obod boʻladi. Katta roʻzgʻorni bemalol tebratadi. Oilamizning 7 nafar aʼzosi mehnat bilan band. Shuning orqasidan toʻylar qilyapmiz, farzandlarimizni oʻqityapmiz, bir oʻgʻlimizga uy quryapmiz, qoʻyingki, qancha xarajat boʻlsa, hammasini qoplaydi. Yillik daromadimiz chakki emas, 35-40 million soʻmgacha boradi. Agar tomorqa boʻlmaganida, shuncha pulni qayerdan topardik?