Нуробод туманидаги Наврўз, Улус ва Ҳалқобод қишлоқларида “Обод қишлоқ” дастури асосида 3 та сув иншооти фойдаланишга топширилди.

“Обод марказ”, “Обод маҳалла”, “Обод қишлоқ” дастурлари доирасида жойларда олиб борилаётган бунёдкорлик, ободонлаштириш ишлари мамлакатимиз аҳолисининг турмуш шароитини яхшилаш, ҳудудлар инфратузилмасини тубдан ўзгартиришга хизмат қилмоқда.

Қишлоқлар аҳолисини йиллар давомида қийнаб келаётган таъмирталаб ички йўллар, тоза ичимлик суви, электр энергияси ва бошқа қатор ижтимоий муаммолар худди шу дастурлар сабаб ўз ечимини топмоқда.

Ўзбекистон Республикаси Президентининг 2019 йил 20 февралдаги “Обод қишлоқ” дастурини 2019 йилда амалга ошириш бўйича қўшимча чора-тадбирлар тўғрисида”ги қарорига асосан Нуробод туманидаги Наврўз, Улус ва Ҳалқобод қишлоқларида кенг кўламли бунёдкорлик ва ободонлаштириш ишлари олиб борилмоқда.

Туманнинг ушбу қишлоқлари кенг дала ва қирликлардан иборат бўлиб, ҳудудда тоза ичимлик суви масаласи аҳолини қийнаб келаётган муаммолардан бири эди. “Обод қишлоқ” дастури доирасида амалга оширилган ишлар натижасида мазкур қишлоқлар аҳолисини тоза ичимлик суви билан таъминлаш мақсадида 3 та сув иншооти фойдаланишга топширилди. Улардан иккитаси янги қурилган, биттаси эса реконструкциядан чиқарилган. Ушбу сув иншоотларини қуриш ва реконструкция қилиш учун 1 миллиард 934,9 минг сўм маблағ сарфланди. Натижада ҳудуддаги 10 минг нафардан ортиқ аҳоли марказлашган ичимлик сувидан фойдаланиш имконига эга бўлди.