Ўзбекистон Республикаси Ички ишлар вазири ўринбосари М.Жўраев 24-25 май кунлари Самарқанд вилоятининг Пастдарғом ва Нуробод туманларида сайёр қабуллар ўтказди.

Қабуллар аввалида ногиронлиги бўлган шахсларга ногиронлик аравачаси, протез-ортопедия воситалари, кам таъминланган ва эҳтиёжманд оилаларга маиший техника воситалари ва уй-рўзғор буюмлари берилди. Шунингдек, фуқаролар тиббий кўрикдан ўтказилиб, мутахассислар томонидан маслаҳатлар берилди, тиббий ёрдам кўрсатилди.

Сайёр қабуллар чоғида фуқароларнинг 70 дан ортиқ мурожаатлари эшитилиб, уларнинг аксарияти жойида мутасаддилар иштирокида ҳал этилди. Ўрганиш талаб қиладиган мурожаатлар юзасидан муддат белгиланди.

Қайд этилишича, аҳоли асосан, уй-жой билан таъминлаш, моддий ёрдам, ерга эгалик ҳуқуқини олиш, тадбиркорлик фаолиятини йўлга қўйиш ва кредит масалаларида мурожаат қилган. 

Пастдарғом туманидаги 32-мусиқа ва санъат мактабида ўтказилган сайёр қабулдан сўнг китоб ярмаркаси ташкил этилди. Шунингдек, маҳалла профилактика инспекторларининг жамоат тартибини сақлаш бўйича ёрдамчиси вазифасига тайинланган йигитларга хизмат гувоҳномалари топширилди.

Ғ.ҲАСАНОВ, ЎзА