Oʻzbekiston Respublikasi Ichki ishlar vaziri oʻrinbosari M.Joʻrayev 24-25-may kunlari Samarqand viloyatining Pastdargʻom va Nurobod tumanlarida sayyor qabullar oʻtkazdi.

Qabullar avvalida nogironligi boʻlgan shaxslarga nogironlik aravachasi, protez-ortopediya vositalari, kam taʼminlangan va ehtiyojmand oilalarga maishiy texnika vositalari va uy-roʻzgʻor buyumlari berildi. Shuningdek, fuqarolar tibbiy koʻrikdan oʻtkazilib, mutaxassislar tomonidan maslahatlar berildi, tibbiy yordam koʻrsatildi.

Sayyor qabullar chogʻida fuqarolarning 70 dan ortiq murojaatlari eshitilib, ularning aksariyati joyida mutasaddilar ishtirokida hal etildi. Oʻrganish talab qiladigan murojaatlar yuzasidan muddat belgilandi.

Qayd etilishicha, aholi asosan, uy-joy bilan taʼminlash, moddiy yordam, yerga egalik huquqini olish, tadbirkorlik faoliyatini yoʻlga qoʻyish va kredit masalalarida murojaat qilgan. 

Pastdargʻom tumanidagi 32-musiqa va sanʼat maktabida oʻtkazilgan sayyor qabuldan soʻng kitob yarmarkasi tashkil etildi. Shuningdek, mahalla profilaktika inspektorlarining jamoat tartibini saqlash boʻyicha yordamchisi vazifasiga tayinlangan yigitlarga xizmat guvohnomalari topshirildi.

Gʻ.HASANOV, OʻzA