G‘allaorol tumani “Yashnaobod” mahalla fuqarolar yig‘inida aholining tomorqa yer maydonlaridan samarali foydalanish, xonadonlarda parrandachilik, chorvachilik, quyonchilik va asalarichilikni tashkil etish va rivojlantirish borasida ko‘rgazmali seminar tashkil etildi.

Unda Jizzax viloyat markaziy banki mas’ul xodimi, tuman IIB boshlig‘i, tuman hokimining o‘rinbosarlari, soha mas’ullari, “mahalla yettiligi” vakillari hamda mahalliy aholi ishtirok etdi.  

Seminardan ko‘zlangan asosiy maqsad  “Bir mahalla–bir mahsulot” tamoyili asosida  vaqtincha ishsiz fuqarolarning bandligini ta’minlab, aholi xonadonlarida tomorqadan samarali foydalanish, chorva va parrandachilikni rivojlantirish, oila byudjetini oshirish va kambag‘allikni qisqartirishdir.

Shuningdek, ishtirokchilarga xonadonlarni kooperatsiya usulida biriktirish va yetishtirilgan mahsulotni markazlashgan holda realizatsiya qilish, tomorqalardan samarali foydalanish bo‘yicha subsidiya, bank xizmatlari va imtiyozli kreditlar ajratish tartiblari to‘g‘risida ham atroflicha tushunchalar berildi.