Наманган шаҳар ҳокими Анвар Отахўжаев ҳудудлардаги ўрганишлари давомида Наманган шаҳар туғуруқ комплексида бўлди.

Ушбу тиббиёт муассасаси 230 ўринга мўлжалланган бўлиб, аҳолига сифатли тиббий хизмат кўрсатиб келмоқда.  

Шаҳар ҳокими туғуруқ комплекси атрофида жойлашган тадбиркорлик субъектлари биноларини кўркам ҳолатда ривожлантириш зарурлигини таъкидлади. Шунингдек, тадбиркорларга қулай шарт-шароитлар яратиш бўйича аниқ тавсиялар берилди.

Куз-қиш мавсумида туғуруқ комплексида иситиш тизимларининг барқарор ишлашини таъминлаш муҳимлиги ҳақида тушунтиришлар ўтказилди ва бу йўналишда зарур чора-тадбирларни амалга ошириш бўйича мутасаддиларга топшириқлар берилди. Шу билан бирга, фуқароларга янада қулай шароитлар яратиш мақсадида қўшимча жойларни ташкил этиш, кириш йўлларини таъмирлаш ҳамда бошқа инфратузилмани яхшилаш лозимлиги қайд этилди.  

Шу куни шаҳар ҳокими Янги йўл маҳалласи фуқаролари билан мулоқот ўтказди. Мулоқот давомида ўзини ўзи банд қилиш учун ажратилаётган имтиёзлар, тадбиркорлар учун яратилаётган имкониятлар ҳақида тушунтиришлар берилди. Шунингдек, маҳалла фуқаролари томонидан кўтарилган бир қатор масалаларни ҳал этиш бўйича мутасаддиларга тегишли топшириқлар берилди.  

Ушбу маҳалла фуқароси Акмал Дадахоновнинг хонадонда бир неча кун аввал кўнгилсиз ҳодиса рўй берган эди. Фалокат оқибатида уйнинг барча хоналари ва жиҳозлари ёниб кетган. Масъуллар жабрланган хонадонда бўлиб, зарарни бартараф этиш ва оиланинг яшаши учун тез фурсатда қулай шароитларни яратиш бўйича амалий ишга киришди.