Сурхондарё вилояти ҳокими ўринбосари, Оила ва хотин-қизлар бошқармаси бошлиғи Зулҳумор Хидирова, Оила ва хотин-қизлар қўмитаси бўлим бошлиғи Нигора Тошқулова, Шеробод тумани ҳокими ўринбосари Адолат Боймуродова ҳудуддаги оилалар турмуш шароитини ўрганиб, фуқаролар муаммоларини тинглади.

Ишчи гуруҳ тумандаги Чуқуркўл маҳалласидаги ётоқли беморлар ҳамда оғир турмуш шароитида яшаб келаётган хотин-қизлар ҳолидан хабар олиб,  уларга озиқ-овқат маҳсулотлари етказиб берди. Бундан ташқари жами 4 нафар, яъни 2 нафар боқувчисини йўқотган хотин-қизга тикув машинаси ва 2 нафарига пишириш печи берилди.  

Шунингдек, масъуллар маҳалладаги низоли оилалар билан мулоқот қилиб, оиладаги мавжуд муаммони ҳал этиш ва оилаларни яраштириш чораларини кўрди.  

Қолаверса, Ўзбекистон Республикаси Вазирлар Маҳкамасининг тегишли қарорига мувофиқ, тумандаги 5 нафар эҳтиёжманд оила хотин-қизларига олий таълим муассасаларига қўшимча давлат гранти асосидаги қабул кўрсаткичлари доирасида танловда иштирок этиш учун тавсиянома берилди.