Surxondaryo viloyati hokimi o‘rinbosari, Oila va xotin-qizlar boshqarmasi boshlig‘i Zulhumor Xidirova, Oila va xotin-qizlar qo‘mitasi bo‘lim boshlig‘i Nigora Toshqulova, Sherobod tumani hokimi o‘rinbosari Adolat Boymurodova hududdagi oilalar turmush sharoitini o‘rganib, fuqarolar muammolarini tingladi.

Ishchi guruh tumandagi Chuqurko‘l mahallasidagi yotoqli bemorlar hamda og‘ir turmush sharoitida yashab kelayotgan xotin-qizlar holidan xabar olib,  ularga oziq-ovqat mahsulotlari yetkazib berdi. Bundan tashqari jami 4 nafar, ya’ni 2 nafar boquvchisini yo‘qotgan xotin-qizga tikuv mashinasi va 2 nafariga pishirish pechi berildi.  

Shuningdek, mas’ullar mahalladagi nizoli oilalar bilan muloqot qilib, oiladagi mavjud muammoni hal etish va oilalarni yarashtirish choralarini ko‘rdi.  

Qolaversa, O‘zbekiston Respublikasi Vazirlar Mahkamasining tegishli qaroriga muvofiq, tumandagi 5 nafar ehtiyojmand oila xotin-qizlariga oliy ta’lim muassasalariga qo‘shimcha davlat granti asosidagi qabul ko‘rsatkichlari doirasida tanlovda ishtirok etish uchun tavsiyanoma berildi.