Олтиариқ тумани ҳокими Шамсиддин Турдалиевнинг навбатдаги сайёр қабули 2-сон касб-ҳунар мактабида бўлиб ўтди. Унда туман ҳокими ўринбосарлари, ташкилотлар раҳбарлари, Халқ қабулхонаси вакиллари иштирок этди.

Ҳокимлик Ахборот хизмати раҳбари Шоҳсултон Тўхтаматовнинг қайд этишича, қабул давомида 120 нафардан ортиқ фуқаронинг турли масалаларга доир мурожаатлари тингланди ва уларнинг барчаси тегишли тартибда рўйхатга олинди.

– Аксарият мурожаатларга ҳуқуқий тушунча ва маслаҳат берилган бўлса, муддат талаб этиладиган мурожаатлар ижро учун мутасаддиларга бириктирилди, – дейди Ш.Тўхтаматов. – Хусусан, уй-жой ҳамда болалар нафақасини олиш масаласи билан келган бир гуруҳ фуқароларга ҳуқуқий тушунча берилди.

Шунингдек, сайёр қабулда Қизилтепа МФЙ Гулистон кўчаси 10-уйда яшовчи 70 ёшли Шоҳринисо ая Қазақованинг фарзанди онаси учун ногиронлик аравачаси сўраб мурожаат қилди. Мурожаат шу ерда ижобий ҳал этилиб, ногиронлик аравачаси топширилди.