Mahalla va oilani qoʻllab-quvvatlash vaziri Raxmat Mamatov Bekobod tumanidagi Dehqonobod mahallasida boʻldi.

Ushbu mahalla Tojikiston Respublikasi bilan chegaradosh boʻlib, tuman markazidan 65-70 kilometr uzoqlikda joylashgan. Mahallada 2 ming 460 nafar aholi istiqomat qiladi. Hududda ehtiyojmand oilalar 15 ta, boquvchisini yoʻqotgan oilalar 11 tani tashkil etadi.

Mahallada va masʼullar faoliyatida mavjud kamchiliklar hamda ularni bartaraf etish boʻyicha topshiriqlar berildi. Bu haqda Mahalla va oilani qoʻllab-quvvatlash vazirligi axborot xizmati xabar berdi.

Uchrashuvda aholi bandligiga koʻmaklashish, ijtimoiy himoyaga muhtoj oilalarni qoʻllab-quvvatlash, huquqbuzarlik sodir etgan fuqarolar bilan olib boriladigan profilaktik chora-tadbirlar, shuningdek, mahalla tizimini aholiga eng yaqin, uning muammolariga yechim topib beruvchi birlamchi tuzilmaga aylantirish boʻyicha tizim xodimlari oldidagi muhim vazifalar tahliliga alohida eʼtibor qaratildi.

Mahallada aloqa tizimi bugungi kunda qoniqarsiz holatda ekanligi va bu holatni bartaraf etish yuzasidan tegishli mutasaddi tashkilotlar bilan koʻrib chiqib muammoni hal etish choralari koʻrilishi aytildi.

Mahalla raisining tomorqa, tadbirkorlik va obodonlashtirish boʻyicha oʻrinbosari AdxamBegatov oʻz vazifasiga sovuqqonlik bilan yondashganligi sababli lavozimidan ozod etildi.

Mahalla raisi Madamin Xolmirzayev va raisning huquq targʻibot masalalari boʻyicha oʻrinbosari Sunnatillo Xoshimovga eski tizimdan voz kechib, yangi gʻoya va tashabbus bilan faoliyat yuritishlari uqtirildi.