Namangan viloyati hokimi Xayrullo Bozorov Yangiqo‘rg‘on tumanidagi chegara hududlarda ijtimoiy-ma’naviy muhitni o‘rganish va mavjud muammolarni hal etishga ko‘maklashish bo‘yicha viloyat ishchi guruhining yakuniy hisobot yig‘ilishida ishtirok etdi.

Ishchi guruh 24 ta mahalladagi 11 ming 971 xonadonda bo‘lib, olib borgan o‘rganishlari natijasida turli yo‘nalishda 2,5 mingta muammo aniqlandi. Ularning 2 ming 13 tasi, ya’ni (80,5 foizi) qisqa fursatda bartaraf etildi. Xususan, ijtimoiy og‘ir ahvolda kun kechirayotgan oilalarning yashash sharoitini yaxshilash maqsadida 2 ta xonadon ta’mirlandi, yana 2 ta xo‘jalikning uyi yangidan qurildi. 2 nafar yoshning OTMda to‘lov shartnoma masalasi hal etildi. Mahalliy aholining 124 nafariga homiylik asosida 62,7 million so‘mlik moddiy yordam ko‘rsatildi. 301 nafar fuqaroga kasanachilik, tikuvchilik, asalarichilik hamda chorvachilik yo‘nalishlar faoliyat olib borishi uchun amaliy yordam ko‘rsatilib, yangi ish o‘rinlari yaratildi.

Viloyat rahbari yuzaki yondashuv bilan muammolarni echib bo‘lmasligini, har bir qo‘yilgan vazifaning ijrosi qog‘ozga qarab emas, pirovardida erishilgan natijaga qarab baholanishini ta’kidlab, bu boradagi zarur chora-tadbirlar, amaliy vazifalarni belgilangan muddatda izchil tahlil etish va xulosa chiqarish yuzasidan mutasaddilarga ko‘rsatma va topshiriqlar berdi.