Mamlakatimizda qishloq xoʻjaligini yana-da rivojlantirish, bu borada har qarich yerdan samarali foydalanish orqali ishlab chiqarish hajmini oshirishga alohida eʼtibor qaratilmoqda.

Tomorqachilikni rivojlantirish bugungi pandemiya sharoiti va u sabab yuzaga kelayotgan global iqtisodiy inqiroz holatida aholi bandligi va daromadini oshirishning asosiy yoʻllaridan biri boʻlib turibdi.

Mahalla va oilani qoʻllab-quvvatlash vazirligi tomonidan yurtimizdagi barcha mahallalarda odamlarning turmush sharoiti, ularni qiynab kelayotgan muammolar oʻrganilishi barobarida tomorqadan samarali foydalanish, bu borada omilkor dehqonlarning ilgʻor tajribalari targʻib qilinmoqda. Eʼtiborli jihati, oʻrganishlar tahlili mehnatkash, tomorqasining har qarich yeridan unumli foydalanib, yuqori daromad topayotgan oilalar koʻpligini koʻrsatmoqda.

Toshkent viloyati Zangiota tumanida istiqomat qiluvchi Xasanjon Oyxoʻjayevlar oilasi ana shunday mehnatsevar, omilkor oilalardan biridir. Xasanjon 1-guruh nogironi. Koʻzlari yorugʻ dunyoni u qadar yaxshi koʻrmasada, halol mehnati, matonati bilan bor imkoniyatlardan oqilona foydalanib kelayotgan shijoatli yoshlardan. Ushbu xonadonga kirib borgan har bir inson bu yigitdagi mehnatga chanqoqlik, kelajakka ishonch hamda bugungi kuniga shukronalik hissini tuyadi.

Xasanjon Oyxoʻjayev bugungi kunda 3,5 sotixli tomorqasida issiqxona tashkil qilib, bir yilda 3 marotaba hosil olmoqda.

– Issiqxonamizda pomidor, bodring, toʻqsonbosti ekinlar ekib, oʻz oilam va aholini qishloq xoʻjaligi mahsulotlari bilan taʼminlab kelayapman, – deydi Xasanjon. – Shu moʻjazgina issiqxonadan har yili yaxshigina daromad olamiz. Bu yil 30 million soʻm daromad olishni moʻljallab turibman.

Koʻzlari yorugʻ dunyoni yaxshi koʻra olmaydigan ushbu yigitning hayot tarzi barchamizga ibrat boʻlmogʻi lozim. Zero, sizu biz “koʻzi ojiz”, deguvchi shu yigitning qalb koʻzi ochiq. Xasanjon qalb koʻzi ila qilayotgan halol mehnati bilan ayrim koʻzi ochiq, boqimandalik kayfiyatiga berilib, “Men yurtimga emas, yurtim menga nima berdi”, deb yashayotgan “soʻqirlarga” har tomonlama ibrat boʻla oladi.