Elmira Basitxanova forum doirasida Jomboy tumanidagi “Gulnora agro eri“ fermer xo‘jaligi ishchi xodimlari bilan uchrashdi. Bu erda 20 nafarga yaqin xotin-qizlar mehnat qiladi.

- Shu fermer xo‘jaligida olti yildan beri ishlaymiz, dala ishlarini qilamiz, pilla olamiz, - deydi Kattaqishloq mahallasida yashovchi Mirzaeva Surayyo. - Har oyda olti yuz ming so‘mdan ziyod maosh olamiz. G‘alladan bo‘shagan erdan yarim gektariga mosh, loviya, kartoshka ekkanmiz. Paxta chopganimizga somon, pilla vaqti un, yog‘ berildi. Ro‘zg‘orimiz shu erni orqasidan, shukur.

Bosh vazir o‘rinbosari fermer xo‘jaligida mehnat qilayotgan xotin-qizlarga sovg‘a-salomlar ulashdi. 

Shundan so‘ng, E.Bositxanova dalada mehnat qilayotgan ayollarni ozroq vaqtlarini olishga ruxsat so‘rab, ularni dala shiyponiga taklif qildi. Suhbat davomida oddiy ayollarning mashaqqatli mehnati, ayol kursidami, daladami, qayda bo‘lmasin oilasining ma’naviy posboni bo‘lishi lozimligi, mehnatga munosib haq to‘lansa, fermerlar tomonidan mehnat sharoitlari yaratib berilsa ayollar hayotdan ko‘ngli to‘lib yashashi mumkinligi borasida fikr almashildi.