Vazirlar Mahkamasining 2018-yil 12-apreldagi qarori asosida joriy yil yakuniga qadar og‘ir ijtimoiy vaziyatga tushib qolgan, nogironligi bo‘lgan, kam ta’minlangan, farzandlarini to‘liqsiz oilada tarbiyalayotgan va uy-joy sharoitini yaxshilashga muhtoj 1 ming 576 xotin-qiz uy bilan ta’minlanadi.

Xotin-qizlar qo‘mitasi matbuot xizmati xabariga ko‘ra, bu uylarning boshlang‘ich badali Xotin-qizlarni va oilani qo‘llab-quvvatlash jamoat fondi mablag‘lari hisobidan to‘lab beriladi. O‘tgan 5 oyda 267 muhtoj xotin-qizga ajratilgan uy-joy boshlang‘ich badali to‘lab berildi.

Shuningdek, Xotin-qizlarni va oilani qo‘llab-quvvatlash jamoat fondi mablag‘lari hisobidan O‘zbekiston Xotin-qizlar qo‘mitasi tavsiyasiga asosan, 1578 muhtoj xotin-qiz va oilalarga moddiy yordam ko‘rsatildi. Jumladan, ularning 652 nafari nogironlik aravachasi, 289 nafari eshitish moslamalari, 637 nafari qo‘ltiq tayoq, hassa kabi yurishga ko‘maklashuvchi moslamalar bilan ta’minlandi, 23 nafariga muzlatkich, 17 nafariga kir yuvish va 11 nafariga tikuv mashinasi kabi maishiy texnikalar, tibbiy jihozlar beg‘araz yetkazib berildi.

Muhayyo TOShQORAEVA, O‘zA