Mahalliy davlat boshqaruvi idoralari, sektorlar rahbarlari tomonidan oʻtkazilayotgan sayyor qabullar aholi bilan yuzma-yuz muloqot asosida odamlarni qiynayotgan muammolarni aniqlash va bartaraf etishda muhim ahamiyat kasb etmoqda.

Namangan viloyati toʻrtinchi sektor rahbari, viloyat davlat soliq boshqarmasi boshligʻi A.Tillavoldiyev oʻziga biriktirilgan Uychi va Chortoq tumanlarida navbatdagi sayyor qabul oʻtkazdi.

Uychi tumanidagi shunday tadbirda aholining shaxsiy va umumiy muammolari, taklif va mulohazalari tinglanib, ularni joyida bartaraf etishga alohida eʼtibor qaratildi. Jumladan, tadbirkor A.Abduvohidovning faoliyatini yanada kengaytirish yuzasidan qilgan murojaati oʻrganilib, amaliy yordam koʻrsatildi. Shuningdek, Bogʻ mahallasida yashovchi Z.Fayzullayevaning ikki sotixlik hovlida ikki oʻgʻli va kelinlari bilan yashayotgani, uning uy-joyga muhtojligi boʻyicha murojaatiga asosan unga kam taʼminlangan oilalar uchun qurilayotgan uylardan ajratish toʻgʻrisida ariza berish tavsiya etildi.

Viloyat davlat soliq boshqarmasi jamoatchilik bilan aloqalar va huquqiy axborot shuʼbasidan maʼlum qilishlaricha, Uychi tumanida oʻtkazilgan sayyor qabulda 100 nafarga yaqin fuqaroning uy-joy, tadbirkorlik faoliyatini yoʻlga qoʻyish, bank kreditiga oid 20 dan ortiq turdagi murojaati koʻrib chiqildi. Uchrashuv davomida murojaatlarning 2 tasi oʻz joyida hal etildi, qolganlari oʻrganish uchun tegishli idora, tashkilot va mahalliy hokimliklarga taqdim etildi.

Akromjon Sattorov, OʻzA