Маҳаллий давлат бошқаруви идоралари, секторлар раҳбарлари томонидан ўтказилаётган сайёр қабуллар аҳоли билан юзма-юз мулоқот асосида одамларни қийнаётган муаммоларни аниқлаш ва бартараф этишда муҳим аҳамият касб этмоқда.

Наманган вилояти тўртинчи сектор раҳбари, вилоят давлат солиқ бошқармаси бошлиғи А.Тиллаволдиев ўзига бириктирилган Уйчи ва Чортоқ туманларида навбатдаги сайёр қабул ўтказди.

Уйчи туманидаги шундай тадбирда аҳолининг шахсий ва умумий муаммолари, таклиф ва мулоҳазалари тингланиб, уларни жойида бартараф этишга алоҳида эътибор қаратилди. Жумладан, тадбиркор А.Абдувоҳидовнинг фаолиятини янада кенгайтириш юзасидан қилган мурожаати ўрганилиб, амалий ёрдам кўрсатилди. Шунингдек, Боғ маҳалласида яшовчи З.Файзуллаеванинг икки сотихлик ҳовлида икки ўғли ва келинлари билан яшаётгани, унинг уй-жойга муҳтожлиги бўйича мурожаатига асосан унга кам таъминланган оилалар учун қурилаётган уйлардан ажратиш тўғрисида ариза бериш тавсия этилди.

Вилоят давлат солиқ бошқармаси жамоатчилик билан алоқалар ва ҳуқуқий ахборот шуъбасидан маълум қилишларича, Уйчи туманида ўтказилган сайёр қабулда 100 нафарга яқин фуқаронинг уй-жой, тадбиркорлик фаолиятини йўлга қўйиш, банк кредитига оид 20 дан ортиқ турдаги мурожаати кўриб чиқилди. Учрашув давомида мурожаатларнинг 2 таси ўз жойида ҳал этилди, қолганлари ўрганиш учун тегишли идора, ташкилот ва маҳаллий ҳокимликларга тақдим этилди.

Акромжон Сатторов, ЎзА