Oʻzbekiston Xotin-qizlar qoʻmitasi tomonidan yordamga muhtoj va ogʻir ijtimoiy ahvolga tushib qolgan xotin-qizlar, shu jumladan, nogironligi boʻlgan ayollarga har tomonlama koʻmak berishga alohida eʼtibor qaratilmoqda.

Ana shunday tizimli ishlar samarasida mamlakat boʻyicha 47 ming nafarga yaqin ogʻir turmush sharoitida yashayotgan va shundan 14 ming 600 nafar nogironligi boʻlgan xotin-qizlar aniqlanib, ular bilan bilan manzilli ishlar olib borilgan. Ulardan 14 ming nafariga tibbiy yordam koʻrsatilgan boʻlsa, 13 ming 500 nafarining bandligi taʼminlangan va 22 ming nafariga moddiy yordamlar berilgan.

Shu bilan birga, yurtimiz boʻyicha 3121 nafar ogʻir turmush sharoitida yashayotgan, uy-joyga muhtoj xotin-qiz uy-joy bilan taʼminlanib, 4 929 nafariga uy olishlari uchun tavsiyalar berilgan.

– Bu kabi ezgu ishlarni davom ettirib, 2019 yilda 1600 nafar ogʻir turmush sharoitidagi ayollarni uy-joy bilan taʼminlash rejalashtirilgan, – dedi Xotin-qizlar qoʻmitasi matbuot xizmati rahbari Laylo Rustamova. – Shuningdek, respublikamizning 200 ta shahar va tumanida istiqomat qilayotgan 1 ming 464 nafar uy-joyga muhtoj xotin-qizga Oʻzbekiston Respublikasi Vazirlar Mahkamasining 2018 yil 12 apreldagi “Ogʻir ijtimoiy vaziyatga tushib qolgan xotin-qizlarga, nogironligi boʻlgan, kam taʼminlangan, farzandlarini toʻliqsiz oilada tarbiyalayotgan va uy-joy sharoitini yaxshilashga muhtoj onalarga arzon uy-joylar berish tartibi toʻgʻrisidagi nizomni tasdiqlash haqida”gi qarori ijrosi boʻyicha uy-joy qurilishi uchun 54 milliard 581 million soʻm miqdorida boshlangʻich 25 foiz badal toʻlab berildi.

Nasiba Ziyodullayeva, OʻzA.