Toshkent davlat iqtisodiyot universitetida Toshkent shahar hokimi v.b. Shavkat Umurzoqov ishtirokida "Hokim va yoshlar" uchrashuvi bo‘lib o‘tdi.

Tadbirda Shavkat Umurzoqov Prezidentimiz tomonidan yoshlar bandligini ta’minlash, sifatli ta’lim bilan qamrab olish va bo‘sh vaqtlarini mazmunli tashkil etish, ijtimoiy qo‘llab-quvvatlash hamda sog‘lom firklashlariga zamin yaratish bo‘yicha vazifalar belgilab berilganini ta’kidlab o‘tdi.  

Qayd etilganidek, ushbu vazifalar ijrosi doirasida 2023 yil davomida ko‘makka muhtoj og‘ir toifadagi yoshlarning muammolari hal qilindi, ishsiz hamda maktab bitiruvchilarining bandligi ta’minlandi.  Bundan tashqari, yil davomida “Yoshlar daftari”ga kiritilgan  yoshlarga ham ko‘mak ko‘rsatilib, muammolari hal qilindi.  

Yoshlarga ko‘maklashish, ularni qo‘llab-quvvatlash borasida kelgusi yilga rejalashtirilgan ishlar, yoshlarning bandligini ta’minlash bo‘yicha manzilli ro‘yxat shakllantirilgani, shuningdek, “Yoshlar daftari” doirasida ko‘mak olishlari kutilayotgani aytib o‘tildi.  

Uchrashuv yakunida Sh.Umurzoqov yoshlarning savollariga javob berib, o‘z hayot va mehnat tajribasi bilan o‘rtoqlashdi. Tadbir yakunida yil davomida yuqori natijalarga erishgan eng faol yoshlar Tashakkurnoma va esdalik sovg‘alari bilan taqdirlandi.