Namangan viloyati Pop tumanidagi 77 ta mahalla fuqarolar yig‘inini bog‘lab turadigan avtomobil yo‘llarining umumiy uzunligi 1395,6 kilometrni tashkil qiladi. Ushbu yo‘llarni soz holatga keltirish, avtomobillar va yo‘lovchilar qatnovini qulaylashtirish maqsadida joriy yilda 370,6 kilometr qismiga asfalt yotqizildi, 5,9 kilometr yo‘l betonlashtirildi.

Tumanda yo‘lsozlik  ishlari qizg‘in davom ettirilmoqda. Bunda “Obod xonadon – obod ko‘cha – obod mahalla” dasturi muhim omil bo‘layotir.

- Yo‘llarimiz ta’mirtalab bo‘lib qolganiga necha o‘n yillar bo‘ldi, - deydi Nurobod mahallasida yashovchi  Sobirjon ota Rahimov. – Ko‘chalarimizda piyoda yurish u yoqda tursin, mashinada harakatlanish ham azob edi. Mana, bugun yo‘llarimizga asfalt yotqizilib, hammayoq obod bo‘lyapti. Buni ko‘rib ko‘nglimiz yorishyapti, xursand bo‘lyapmiz. Axir yurting, mahallang obod bo‘lsa, ko‘ngil obod bo‘ladi-da...