Farg‘ona shahrida 6 nafar yetim va ota-ona qaramog‘idan mahrum bo‘lgan yoshlar o‘z uylariga ega bo‘ldi. Viloyat hokimi Xayrullo Bozorov ularga ajratilgan xonadonlarning kalitlarini topshirdi.

Mamlakatimizda yetim bolalar va ota-ona qaramog‘idan mahrum bo‘lgan bolalarning huquq va erkinliklarini ro‘yobga chiqarish, ijtimoiy himoyasini kuchaytirish, ularni davlat tomonidan qo‘llab-quvvatlash masalasiga alohida e’tibor qaratilmoqda.

O‘tgan yili viloyatda 18 yoshga to‘lgan 29 nafar yetim va ota-ona qaramog‘idan mahrum bo‘lgan yoshlarga ko‘p kvartirali uy-joylardan kvartira taqdim etilgan bo‘lsa, bu yil 17 nafar yigit-qiz ta’mirlangan va to‘la jihozlangan uy-joylar egasiga aylanmoqda. Ushbu maqsad uchun Prezidentimiz ko‘rsatmasi bilan respublika byudjeti mablag‘laridan 2 milliard 412 million so‘m uy-joylar sotib olishga ajratilgan bo‘lsa, ta’mirlash va jihozlash ishlariga mahalliy byudjetning orttirib bajarilgan qismidan mablag‘ sarflandi.

Farg‘ona shahrida 6 nafar yoshlar – Erika Ribalko, Alina Kabilova, Madina Atayeva, Nozimaxon Ergasheva, Akbarxon Karimov va Umid Shermatov o‘z nomlariga rasmiylashtirilgan kvartiralar kalitlarini viloyat hokimi qo‘lidan qabul qilib oldi. Ularning barchasi doimiy ish o‘rniga ham ega bo‘ldi.

Joriy yil yakuniga qadar viloyatda yana 11 nafar – Marg‘ilonda 6 nafar, O‘zbekiston tumanida 2 nafar, Furqat tumanida 2 nafar va Buvayda tumanida 1 nafar yetim va ota-ona qaramog‘idan mahrum bo‘lgan yoshlar uy-joy bilan ta’minlanadi. Viloyat hokimi bilan muloqotda bo‘lgan yoshlar Prezidentimizga minnatdorlik bildirib, kelajakda el-yurtga sadoqat bilan xizmat qiladigan insonlar bo‘lishga va’da berdi.