Фарғона шаҳрида 6 нафар етим ва ота-она қарамоғидан маҳрум бўлган ёшлар ўз уйларига эга бўлди. Вилоят ҳокими Хайрулло Бозоров уларга ажратилган хонадонларнинг калитларини топширди.

Мамлакатимизда етим болалар ва ота-она қарамоғидан маҳрум бўлган болаларнинг ҳуқуқ ва эркинликларини рўёбга чиқариш, ижтимоий ҳимоясини кучайтириш, уларни давлат томонидан қўллаб-қувватлаш масаласига алоҳида эътибор қаратилмоқда.

Ўтган йили вилоятда 18 ёшга тўлган 29 нафар етим ва ота-она қарамоғидан маҳрум бўлган ёшларга кўп квартирали уй-жойлардан квартира тақдим этилган бўлса, бу йил 17 нафар йигит-қиз таъмирланган ва тўла жиҳозланган уй-жойлар эгасига айланмоқда. Ушбу мақсад учун Президентимиз кўрсатмаси билан республика бюджети маблағларидан 2 миллиард 412 миллион сўм уй-жойлар сотиб олишга ажратилган бўлса, таъмирлаш ва жиҳозлаш ишларига маҳаллий бюджетнинг орттириб бажарилган қисмидан маблағ сарфланди.

Фарғона шаҳрида 6 нафар ёшлар – Эрика Рибалко, Алина Кабилова, Мадина Атаева, Нозимахон Эргашева, Акбархон Каримов ва Умид Шерматов ўз номларига расмийлаштирилган квартиралар калитларини вилоят ҳокими қўлидан қабул қилиб олди. Уларнинг барчаси доимий иш ўрнига ҳам эга бўлди.

Жорий йил якунига қадар вилоятда яна 11 нафар – Марғилонда 6 нафар, Ўзбекистон туманида 2 нафар, Фурқат туманида 2 нафар ва Бувайда туманида 1 нафар етим ва ота-она қарамоғидан маҳрум бўлган ёшлар уй-жой билан таъминланади. Вилоят ҳокими билан мулоқотда бўлган ёшлар Президентимизга миннатдорлик билдириб, келажакда эл-юртга садоқат билан хизмат қиладиган инсонлар бўлишга ваъда берди.