Fuqarolarning sud-huquq sohasidagi murojaatlariga samarali yechim topish uchun yanada qulay sharoit yaratish maqsadida O‘zbekiston Respublikasi Prezidenti Administratsiyasi, Oliy sud, Sudyalar Oliy Kengashi, Bosh prokuratura va boshqa huquqni muhofaza qilish organlari rahbar xodimlari ishtirokida Qoraqalpog‘iston Respublikasida ommaviy qabullar boshlandi.

Jumladan, Qo‘ng‘irot tumanida bo‘lib o‘tgan ommaviy qabulda O‘zbekiston Respublikasi Oliy sudi raisining o‘rinbosari B.Isakov tomonidan jami 31 nafar fuqaro qabul qilindi. Fuqarolarning 23 ta  murojaati jinoyat ishlari bo‘yicha, 6 tasi fuqarolik ishlar bo‘yicha, 1 tasi ma’muriy ishlar buyicha, 1 tasi iqtisodiy ishlar buyicha sudlarga oid murojaatni tashkil etadi. Shundan 29 nafar fuqaroning og‘zaki, 2 nafar fuqaroning yozma murojaati qabul qilindi.

Jami 31 ta murojaatdan 14 tasi bo‘yicha huquqiy tushuntirish berildi, 15 ta murojaat joyida ijobiy hal etildi. Jumladan,  jinoyat ishlari bo‘yicha Qo‘ng‘irot tuman sudi tomonidan jami 10 nafar mahkumga nisbatan, shundan 2 nafar shaxs jazoni o‘tashdan muddatidan oldin ozod qilindi, 8 nafar shaxsga nisbatan tayinlangan ozodlikdan maxrum qilish jazolari yengilrog‘i bilan almashtirildi. Shuningdek,  2 ta murojaat bo‘yicha arizalar Oliy sud tomonidan kassatsiya tartibida xal qilish uchun qabul qilindi. Ushbu murojaatlarning barchasi qanoatlantirilib, tegishli sudlov xay’atiga ko‘rib chiqish uchun o‘tkazildi. Fuqarolik ishlari bo‘yicha sudlar tomonidan 5 nafar shaxsga nisbatan ish haqi undirish haqidagi arizalar qanoatlantirildi.

Tadbirda Qoraqalpog‘iston Respublikasi Jo‘qorg‘i Kengesi Raisi M.Kamalov ishtirok etdi.