Qarshi shahrida kam taʼminlangan, ijtimoiy himoyaga muhtoj 72 oilaga yangi xonadonlar kaliti topshirildi. Shu munosabat bilan oʻtkazilgan tadbirda Qashqadaryo viloyati hokimligi, keng jamoatchilik vakillari, yangi xonadon sohiblari va ularning yaqinlari ishtirok etdi.

Mamlakatimizda soʻnggi yillarda ijtimoiy himoyaga muhtoj aholi qatlamini himoya qilish, ularni munosib ish oʻrni va uy-joy bilan taʼminlash masalalari yangi bosqichga koʻtarilgani taʼkidlandi. 

– Moddiy sharoitimiz yaxshi emasligi bois 10 yildan ortiq ijarada yashashga majbur boʻldik, – deydi Qarshi shahridan Madhiya Tohirova. – Taqdir sinovi achchiq keldi, 4 oy oldin turmush oʻrtogʻim olamdan oʻtdi. Birgina farzandim bilan yolgʻiz, boshpanasiz qoldim. Roʻzgʻordan orttirib, uy qurishga imkonim yoʻq edi. Davlatimiz tomonidan uy-joyga, ijtimoiy koʻmakka muhtojlarga yordam berilayotganini eshitib, hokimiyatga murojaat qildim. Mutasaddilar oilaviy sharoitimni oʻrgandi. Nihoyat, mana bugun Qarshi shahridagi Shayxali mahallasi hududida qurib bitkazilgan koʻp qavatli uyda oʻz xonadonimizga ega boʻldik. Bu yerda farzandim bilan baxtli hayot kechiramiz. 

Maʼlumot oʻrnida aytish joizki, Qarshi shahri Shayxali mahallasida joylashgan eski koʻp qavatli binodan ancha vaqtdan buyon foydalanilmayotgan edi. Mahalliy hokimlik byudjetidan 4 milliard 600 million soʻm mablagʻ ajratilib, ushbu binoda kapital qurilish ishlari amalga oshirildi. 72 oilaning quvonchiga sabab boʻlgan bu uy 2 va 1 xonali xonadonlardan iborat. Mazkur koʻp qavatli uy yonida turgan boshqa eski binodan ham keyinchalik samarali foydalanish maqsad qilingan. Uning negizida tikuvchilik sexi tashkil etiladi. Ushbu sexda esa yangi uyda yashovchi xotin-qizlar ish bilan band boʻladi. Shuningdek, shu hududdan yer ajratilib, issiqxona barpo etish koʻzda tutilgan. Uning ishchilari ham yangi xonadonlar vakillari boʻladi. 

Tadbir doirasida 30 nafar nogironligi bor shaxsga maxsus aravachalar ham topshirildi. 

Oʻlmas Barotov, Jamshid Norqobilov (surat), OʻzA