Surxondaryo viloyati Termiz shahridagi «Guliston» mahalla fuqarolar yig‘inida «Obod mahalla» dasturi doirasida qator obodonlashtirish va ko‘kalamzorlashtirish ishlari bugungi kunga qadar qizg‘in davom etmoqda.

Mahalla va oilani qo‘llab-quvvatlash vaziri o‘rinbosari Botir Parpiyev boshchiligidagi Ishchi guruh tomonidan ushbu mahalla hududi bo‘yicha aniq belgilangan vazifalar ijrosi ta’minlanmoqda.

Jumladan, yo‘l-transport infratuzilmasini takomillashtirish, muhandislik-kommunikatsiya tarmoqlari hamda ijtimoiy soha ob’ektlarini yanada yaxshilashga qaratilgan amaliy ishlar natijasida hudud butunlay yangi qiyofa kasb etdi.

Aholini toza ichimlik suvi bilan ta’minlashga jiddiy e’tibor qaratildi. Buning uchun ichimlik suvini o‘tkazishga mo‘ljallangan 2,6 km.likpoliyetilen trubalar mahalla hududiga tortib keltirildi. Mahallaning 9,2 km.lik ichki ko‘chalariga to‘liq asfalt yotqizildi. Barcha ko‘chalarda piyodalar yo‘lakchasi qurilib, eski simyog‘ochlar o‘rniga beton ustunlar va zamonaviy tungi yoritish chiroqlari o‘rnatildi. Mahalla markazida zamonaviy bolalar sport maydoncha qad rostladi.

«Guliston» mahallasidagi barcha oilalar, xususan, markazdan olisroqda joylashgan xonadonlarga 5,1 km.lik yangi elektr tarmog‘i tortilib, zamonaviy transformator o‘rnatildi. Shuningdek, mavjud gaz tarmoqlari qaytadan modernizatsiya qilinib, 8 ta gaz taqsimlash punktlarini qurildi.

bugungi kunga qadar mahalladagi 48 ta xonadon va ularga tegishli uy-joy va qo‘shimcha xo‘jalik binolari qayta ta’mirlandi.

«Guliston» mahallasidagi bu kabi qurilish va obodonlashtirish ishlari ayni vaqtda qizg‘in davom etmoqda.

Belgilangan rejaga muvofiq, tez fursatda mahalladagi ijtimoiy himoyaga muhtoj va ishsiz fuqarolar yashaydigan 24 ta xonadonning har biriga 4-6 sotixli issiqxona tashkil etiladi.

Taklif va tashabbuslar natijasida 35 ta xonadon a’zolarining chorvachilik va parrandachilik, 74 tasida tikuvchilik bilan shug‘ullanishlari uchun zarur shart-sharoitlar yaratiladi.