Davlat xizmatlari agentligi Buxoro viloyati boshqarmasi tomonidan jismoniy va yuridik shaxslardan kelib tushgan murojaatlarning Qonunda belgilangan tartibda o‘z vaqtida har tomonlama va sifatli ko‘rib chiqilishi fuqarolarning tizimga bo‘lgan ishonchini yanada oshishiga xizmat qilmoqda.

O‘tgan 2020 yilda boshqarmaga jami 400 dan ortiq murojaat kelib tushgan. Shundan 200 ga yaqin murojaat qanoatlantirilgan. 180 dan ortiq murojaatga huquqiy tushuntirish berilgan.

Fuqaro F.J.uy-joyini kadastr qilolmayotganligi bo‘yicha boshqarmaga murojaat qilgan. Murojaat qisqa vaqt davomida mutaxassislar tomonidan to‘liq o‘rganib chiqilgan. Natijada murojaat ijobiy hal qilingan.

– Davlat xizmatlari agentligining asosiy maqsadi ham aholiga turli to‘siqlarsiz va ortiqcha hujjatlarsiz davlat xizmatlari ko‘rsatishdan iborat, – deydi Davlat xizmatlari agentligi viloyat boshqarmasi tashkiliy-tahlil bo‘limi bosh maslahatchisi Dilshod Naimov. – Alohida ta’kidlab o‘tish joiz, tashkil etilganidan toki bugungi kungacha jismoniy va yuridik shaxslarga tezkor, qulay va shaffof davlat xizmatlarini ko‘rsatish orqali “Fuqarolar emas, hujjatlar harakatlanadi” tamoyilini yangi bosqichga olib chiqdik. Natijada xalqimiz ko‘nglidan joy olgan tashkilotlardan biri bo‘lishga ulgurdik, desak mubolag‘a bo‘lmaydi. Zero, davlatimiz rahbari ta’kidlaganidek, “Xalq davlat idoralariga emas, davlat idoralari xalqqa xizmat qilishi kerak”.