Давлатимиз раҳбарининг 2022 йил 25 октябрдаги “2022-2023 йилларда маҳаллалар инфратузилмасини янада яхшилаш бўйича қўшимча чора-тадбирлар тўғрисида”ги қарори ижросини таъминлаш мақсадида Наманган вилояти Мингбулоқ тумани “Тегирмонбоши” маҳалла фуқаролар йиғини ҳудудида ичимлик суви тармоғини тортиш ишлари олиб борилмоқда.

Аввал маҳаллада мавжуд 540 хонадоннинг 263 тасигина ичимлик суви билан таъминланган эди. Қолган 277 хонадонга эса ичимлик суви етиб келмаган. Лойиҳа бўйича 2624 нафар аҳоли яшовчи барча хонадонларга ичимлик суви олиб кирилиши назарда тутилган.

Шунингдек, маҳалла ҳудудидаги сув иншооти қайта реконструкция қилиниши режалаштирилган. Бу ишларни бажариш учун умумий қиймати 1 миллиард 690 миллион сўм маблағ йўналтирилган.

Ҳозирда 1780 метр траншея қазилиб, тармоқ тортиш ишлари олиб борилмоқда. Шу билан бирга сув иншооти ҳам қайта қурилмоқда. Мазкур ишлар амалга оширилгандан сўнг, маҳалла аҳолиси юз фоиз тоза ичимлик суви билан таъминланишига эришилади.