Davlatimiz rahbarining 2022 yil 25 oktyabrdagi “2022-2023 yillarda mahallalar infratuzilmasini yanada yaxshilash bo‘yicha qo‘shimcha chora-tadbirlar to‘g‘risida”gi qarori ijrosini ta’minlash maqsadida Namangan viloyati Mingbuloq tumani “Tegirmonboshi” mahalla fuqarolar yig‘ini hududida ichimlik suvi tarmog‘ini tortish ishlari olib borilmoqda.

Avval mahallada mavjud 540 xonadonning 263 tasigina ichimlik suvi bilan ta’minlangan edi. Qolgan 277 xonadonga esa ichimlik suvi yetib kelmagan. Loyiha bo‘yicha 2624 nafar aholi yashovchi barcha xonadonlarga ichimlik suvi olib kirilishi nazarda tutilgan.

Shuningdek, mahalla hududidagi suv inshooti qayta rekonstruksiya qilinishi rejalashtirilgan. Bu ishlarni bajarish uchun umumiy qiymati 1 milliard 690 million so‘m mablag‘ yo‘naltirilgan.

Hozirda 1780 metr transheya qazilib, tarmoq tortish ishlari olib borilmoqda. Shu bilan birga suv inshooti ham qayta qurilmoqda. Mazkur ishlar amalga oshirilgandan so‘ng, mahalla aholisi yuz foiz toza ichimlik suvi bilan ta’minlanishiga erishiladi.