Ўзбекистон Республикаси Адлия вазири ўринбосари А.Муҳаммадиев Ургут тумани Кенагас маҳалласида сайёр қабул ўтказди.

Туман ҳокимлиги, вилоят адлия бошқармаси, давлат хизматлари агентлиги вилоят бошқармаси масъуллари иштирокида ўтказилган қабулда аҳоли ҳамда тадбиркорлик субъектларининг уй-жой, моддий ёрдам, тиббий хизмат, кредит олиш, алимент ундириш, пенсия ва нафақа тайинлаш, бандлик сингари масалалар юзасидан 100 га яқин мурожаати эшитилди. 

Омонқўтон маҳалласида яшовчи, қарийб 60 ёшни қарши олган Худойберди Маҳмудов турмуш ўртоғи Азиза Маматқулова билан шу пайтгача шаърий никоҳ асосида яшаб келгани, қонуний никоҳдан ўтишда муаммоларга дуч келаётганини айтиб, ёрдам сўради. Бу оиланинг никоҳи шу ерда расман қонунийлаштирилиб, гувоҳнома топширилди. 

– Қизим, Дилнура Аъзамова яқинда 16 ёшга тўлади, – дейди З.Раупова. – Энди паспорт олиши керак, лекин туғилганлик гувоҳномаси йўқлиги сабабли бу масала муаммо бўлаётганди. Беэътиборсизлигимиз боланинг келажагига таъсир қилди. Қабулда вазиятимни тушунтириб, ёрдам сўрадим. Масалам жойида ҳал бўлди. 

 Қабул давомида туман бандликка кўмаклашиш маркази томонидан бўш иш ўринлари ярмаркаси ташкил этилди, давлат хизматлари маркази, нотариус ва адлия бўлими томонидан фуқароларга ҳуқуқий ёрдам ва давлат хизматлари кўрсатилди.