Бухоро вилоят прокуратурасининг хабарига кўра, Ғиждувон туманидаги “Оғитма” табиий сув ҳавзасига қуюлувчи дренажнинг 642-пикет қисми ва Шофиркон туманидаги “Толди” зовурининг 15, 25, 40 ва 90-пикетларида фуқаролар томонидан ноқонуний дамбалар ўрнатилганлиги сабабли табиий сув ҳавзасида сув камайиб бораётганлиги ҳақида мурожаат бўлган. Унда бу ҳаракатлар балиқчилик соҳасини ривожлантиришга тўсиқ бўлаётгани айтилади.

Натижада мурожаатни ўрганиш жараёнида “Барака” МФЙ ҳудудидан ўтувчи “Оғитма” коллекторидан “Оғитма” табиий сув ҳавзасига ўтувчи сув йўллари беркитилиб, сув “Ғиждувон” канали ҳамда бошқа ерларга йўналтирилганлиги аниқланди.  

Ғиждувон ва Шофиркон туманлари ирригация бўлими мутасаддилари томонидан ўзига юклатилган вазифаларга эътиборсизларча муносабатда бўлганликлари сабабли фуқаролар томонидан ноқонуний дамбалар ўрнатилган. Муаммога ўз вақтида ечим топмаган, қонунбузилиши, унинг келиб чиқиш сабабларини бартараф этмаган мутасаддилар тегишли тартибда қонун олдида жавоб беришлари тўғрисида “Аму Бухоро” ирригация тизимлари ҳавза бошқармасига тақдимнома киритилди.

Айни пайтда “Оғитма” табиий сув ҳавзасига кетадиган сув йўлидаги дамба ва тўсиқлар Ғиждувон ва Шофиркон туман ирригация бўлимлари томонидан тўлиқ бартараф этилиши таъминланиб, мурожаат қаноатлантирилди.

Ҳар бир мурожаат ортида аввало, инсон омили, унинг муаммолари ўз ифодасини топади. Мурожаатларнинг ижобий ҳал этилишида эса, нафақат бир фуқаронинг, балки жамият, давлатнинг ҳам манфаатлари ҳимоя қилинади.