Hududlarda tadbirkorlarning murojaatlari bilan bog‘liq muammolarni o‘rganish maqsadida Adliya vaziri boshchiligidagi Respublika ishchi guruhi tomonidan joriy yilning 18 sentyabr kuni Andijon viloyatida tadbirkorlik sub’ektlari bilan sayyor qabullar o‘tkazildi.

Sayyor qabul davomida bir qancha tadbirkorlarning ko‘pdan beri qiynab kelayotgan muammolari o‘z echimini topdi.

Jumladan, Xonobod shahrida faoliyat yuritib kelayotgan “Lens textile invest” MChJ hozirgi kunda 240 nafar ishchi o‘ringa ega bo‘lib, bu erda bolalar, ayollar va erkaklar kiyimlari ishlab chiqariladi.

Tadbirkor tomonidan o‘z ishlab chiqarish faoliyatini yanada kengaytirish, qo‘shimcha 100 nafar ishchi o‘rinlarini yaratish hamda xorijiy davlatlarga eksport hajmini yanada oshirish maqsadida Turkiya va Xitoy davlatlaridan jami 644 ming AQSh dollarlik qo‘shimcha dastgohlar sotib olish uchun shartnoma imzolangan.

Tadbirkor tomonidan ushbu loyihaning 622 ming AQSh dollari kredit evaziga amalga oshirilishi belgilangan, biroq shu kunga qadar barcha hujjatlar taqdim etilishiga qaramay tadbirkorga kredit ajratilmay kelingan.

Adliya vaziri boshchiligidagi ishchi guruh tomonidan tadbirkor murojaati joyida ko‘rib chiqilib, Respublika “O‘zsanoatqurilishbank”i tomonidan tadbirkorga 500 ming AQSh dollari miqdoridagi kredit ajratilishi ta’minlandi.

“Lens textile invest” MChJ tomonidan aylanma mablag‘ va dastgohlar sotib olish uchun kredit olmoqchi edik, shu muammo anchadan buyon hal bo‘lmay kelayotgan edi. Adliya vazirining sayyor qabulini eshitib biz ham shu masalada qabullarida bo‘ldik, Adliya vaziri tomonidan shu joyning o‘zida Respublika “O‘zsanoatqurilish” banki bilan bog‘lanib bizning muammoni qonuniy hal qilib berdi. Hozirgi kunda biz ushbu ajratilgan kredit evaziga yangi tikuv dastgohlarini sotib olib, yana qo‘shimcha ishchi o‘rinlarini yaratyapmiz. Buning uchun davlatimiz rahbariga va Adliya vaziriga o‘z minnatdorchiligimizni bildirib qolamiz deydi – MChJ rahbari bilan suhbat davomida.

Kechga qadar davom etgan ushbu sayyor qabul davomida ko‘plab tadbirkorlarning murojaatlari ko‘rib chiqildi.