Мазкур Реестр давлат органлари ва ташкилотлари томонидан кўрсатиладиган барча давлат хизматларини хатловдан ўтказиш натижаси бўйича шакллантирилган бўлиб, жами 716 та давлат хизмати ҳақидаги маълумотларни ўз ичига олади.

Маълумот учун: дастлабки реестр 2018 йил 28 февраль куни Адлия вазири ва Ахборот технологиялари ва коммуникацияларини ривожлантириш вазири томонидан тасдиқланди ҳамда 2976-сон билан давлат рўйхатидан ўтказилган бўлиб, 444 хизматдан иборат бўлган. Кейинчалик 2018 йил 1 июнда Адлия вазирлиги ва Ахборот технологиялари ва коммуникацияларини ривожлантириш вазирлигининг қарори билан Давлат хизматлари ягона реестри тасдиқланди ва 3021-сон билан Адлия вазирлигида рўйхатдан ўтказилди. У ўз ичига 693 та давлат хизматларини қамраб олган эди.

Эслатиб ўтамиз, Аҳолига давлат хизматлари кўрсатишнинг миллий тизимини тубдан ислоҳ қилиш чора-тадбирлари тўғрисидаги Президент Фармонига асосан Адлия вазирлигига манфаатдор вазирлик ва идоралар билан биргаликда Давлат хизматлари ягона реестрини шакллантиришни таъминлаш вазифаси юклатилиб, 2018 йил 1 июндан бошлаб эса Давлат хизматларининг ягона реестрига киритилмаган давлат хизматларини кўрсатишга йўл қўйилмаслиги белгилаб қўйилган эди.