Mazkur Reestr davlat organlari va tashkilotlari tomonidan ko‘rsatiladigan barcha davlat xizmatlarini xatlovdan o‘tkazish natijasi bo‘yicha shakllantirilgan bo‘lib, jami 716 ta davlat xizmati haqidagi ma’lumotlarni o‘z ichiga oladi.

Ma’lumot uchun: dastlabki reestr 2018 yil 28 fevral kuni Adliya vaziri va Axborot texnologiyalari va kommunikatsiyalarini rivojlantirish vaziri tomonidan tasdiqlandi hamda 2976-son bilan davlat ro‘yxatidan o‘tkazilgan bo‘lib, 444 xizmatdan iborat bo‘lgan. Keyinchalik 2018 yil 1 iyunda Adliya vazirligi va Axborot texnologiyalari va kommunikatsiyalarini rivojlantirish vazirligining qarori bilan Davlat xizmatlari yagona reestri tasdiqlandi va 3021-son bilan Adliya vazirligida ro‘yxatdan o‘tkazildi. U o‘z ichiga 693 ta davlat xizmatlarini qamrab olgan edi.

Eslatib o‘tamiz, Aholiga davlat xizmatlari ko‘rsatishning milliy tizimini tubdan isloh qilish chora-tadbirlari to‘g‘risidagi Prezident Farmoniga asosan Adliya vazirligiga manfaatdor vazirlik va idoralar bilan birgalikda Davlat xizmatlari yagona reestrini shakllantirishni ta’minlash vazifasi yuklatilib, 2018 yil 1 iyundan boshlab esa Davlat xizmatlarining yagona reestriga kiritilmagan davlat xizmatlarini ko‘rsatishga yo‘l qo‘yilmasligi belgilab qo‘yilgan edi.