Навоий вилоятида Ўзбекистон Республикаси Бош вазирининг тадбиркорлар мурожаатларини кўриб чиқиш Қабулхонаси фаолият бошлади.

Ўзбекистон Республикаси Президентининг 2019 йил 14 майдаги “Тадбиркорлик фаолиятини қўллаб-қувватлаш ва ҳимоя қилиш тизимини тубдан такомиллаштириш чора-тадбирлари тўғрисида” ги фармони асосида ташкил этилган мазкур қабулхона раҳбари вазифасини бажарувчи этиб Ўзбекистон Республикаси Савдо-саноат палатаси Навоий вилояти ҳудудий бошқармаси бошлиғи лавозимида ишлаб келган Шакаров Дилшод Эсанович тайинланди.

Фармонда белгиланганидек, қабулхона тадбиркорлик субъектларини ҳамда чет эллик инвесторларни қабул қилиш, уларнинг ҳуқуқ ва қонуний манфаатларига риоя қилинишини таъминлашга хизмат қилиши кўзда тутилган. Шунингдек, тадбиркорликни ривожлантиришга тўсқинлик қилаётган муаммоли масалаларни кўриб чиқиш, амалиётда учраётган айрим муаммоларни мониторинг қилиш, умумлаштириш ва таҳлил қилиш, шунингдек, бу соҳадаги қонун ҳужжатларини такомиллаштириш бўйича таклифлар тайёрлаш вазифаларини амалга оширади.

Нуриддин РАҲИМОВ, ЎзА