Navoiy viloyatida O‘zbekiston Respublikasi Bosh vazirining tadbirkorlar murojaatlarini ko‘rib chiqish Qabulxonasi faoliyat boshladi.

O‘zbekiston Respublikasi Prezidentining 2019-yil 14-maydagi “Tadbirkorlik faoliyatini qo‘llab-quvvatlash va himoya qilish tizimini tubdan takomillashtirish chora-tadbirlari to‘g‘risida” gi farmoni asosida tashkil etilgan mazkur qabulxona rahbari vazifasini bajaruvchi etib O‘zbekiston Respublikasi Savdo-sanoat palatasi Navoiy viloyati hududiy boshqarmasi boshlig‘i lavozimida ishlab kelgan Shakarov Dilshod Esanovich tayinlandi.

Farmonda belgilanganidek, qabulxona tadbirkorlik sub’ektlarini hamda chet ellik investorlarni qabul qilish, ularning huquq va qonuniy manfaatlariga rioya qilinishini ta’minlashga xizmat qilishi ko‘zda tutilgan. Shuningdek, tadbirkorlikni rivojlantirishga to‘sqinlik qilayotgan muammoli masalalarni ko‘rib chiqish, amaliyotda uchrayotgan ayrim muammolarni monitoring qilish, umumlashtirish va tahlil qilish, shuningdek, bu sohadagi qonun hujjatlarini takomillashtirish bo‘yicha takliflar tayyorlash vazifalarini amalga oshiradi.

Nuriddin RAHIMOV, O‘zA