Бойсун тумани ҳокими Баҳодир Шукуров ёшлар билан учрашиб, улар билан дилдан суҳбатлашди. Дуч келаётган муаммоларини эшитиб, ҳал этиш йўлларини излади.

Мустақиллик ёш авлоднинг чуқур таълим олиб, ўз салоҳиятини кенг намойиш этиши, илм-фан, маданият, санъат, спорт каби йўналишларда дунё ёшлари билан беллашиб, мамлакатимиз довруғини жаҳонга янада кенгроқ ёйиши, бизнесини йўлга қўйиб, муваффақиятларга эришиши, ўзи танлаган касбда Ватан, миллат ва халқ фаровонлиги учун хизмат қилишига қулай муҳит яратди –деди туман раҳбари.

Эндиликда сизлар бу имкониятлардан оқилона фойдаланиб, Янги Ўзбекистон бунёдкорларининг энг фаол, энг ташаббускор иштирокчиси бўлишингиз лозим. Бу йўлда тўсиқ ва муаммоларга дуч келсангиз, қўлимиздан келган барча ёрдамни аямаймиз. Тумандаги муассаса, ташкилот ва корхоналар раҳбарлари ҳам иштирок этган очиқ мулоқотда йигит-қизлар қатор таклиф ва тавсияларни билдирди. Муҳим масалаларни ўртага ташлаб, иш билан таъминлаш, имтиёзли кредит олиш, олий таълимдаги контракт тўловларига кўмаклашиш каби муҳим масалаларни айтди.

 Ўзларини қизиқтирган саволларга жавоб олди. Учрашувда ёшлар ўртага ташлаган муаммоларни ечиш юзасидан мутасаддиларга тегишли топшириқлар берилиб, вақт талаб этадиган масалаларга аниқ муддат белгиланди. Ижроси қатьий назоратга олинди.