Мамлакатимизда аҳолининг ижтимоий ҳимояга муҳтож қатламини моддий ва маънавий қўллаб-қувватлаш, жамиятда ўзаро меҳр-оқибат, ҳамжиҳатлик ва хайр-саховат муҳитини янада мустаҳкамлаш борасида кенг кўламли ишлар амалга оширилмоқда.

Инсон қадрини улуғлаш ва фаол маҳалла йилида бу борадаги ишлар янги босқичга кўтарилди. Фарғона вилоятида Қурбон ҳайити арафасида эзгу амалларнинг кўлами янада кенгайиб, дилларга хушнудлик улашмоқда. Олтиариқ тумани ҳокимлиги томонидан “Инсон қадри учун” шиори остида тумандаги эҳтиёжманд оилаларнинг 21 нафар фарзандига суннат тўйлари ўтказиб берилди.  

Тўй болаларнинг ҳар бирига велосипед, ширинликлар, бош-оёқ сарпо ҳамда бир қатор совғалар топширилди. Туман ҳокими Шамсиддин Турдалиев жажжи кичкинтойлар келажакда Ватанимиз ривожи учун хизмат қиладиган комил шахс бўлиб камол топишлари, Ватанига садоқатли, зиёли инсонлар бўлишига ишонч билдирди. 

– Мустақил диёримизда ҳар бир оила, ҳар бир бола бахтли бўлиши учун халқчил ислоҳотлар амалга оширилмоқда, – дейди тўй болаларнинг ота-оналари. – Бизларга ҳамиша ғамхўрлик қилиб келаётган давлатимиз раҳбарига чексиз миннатдорлик билдирамиз. Катта шодиёналар билан ўтган тўй даврасига таниқли хонандалар куй ва қўшиқлари билан янада файз киритди.