Бухоро вилояти прокурори Маҳмуд Истамов оғир ҳудуд тоифасига киритилган Қоракўл тумани “Қулончи” маҳалласида ободонлаштириш ва ижтимоий инфратузилмани яхшилаш борасида амалга оширилаётган ишлар билан танишди. Маҳалла аҳолиси билан учрашди.

Дастлаб, аҳолига қулайлик яратиш мақсадида ташкил қилинган арзонлаштирилган савдо ярмаркасининг савдо расталарига чиқарилган озиқ-овқат маҳсулотларининг сифати ва нархлар барқарорлиги ўрганилди. 

Сўнгра, жисмоний ва юридик шахсларнинг вакиллари қабул қилинди. Уларнинг муаммолари тингланди. Тадбир доирасида, аҳоли саломатлигини яхшилаш мақсадида бепул тиббий кўрик ташкил этилди.  

Ногиронлиги бўлган фуқароларга 4 та эшитиш  мосламаси, 5 дона ҳасса берилди. “Ёшлар дафтари” га рўйхатга киритилган тадбиркорлик билан шуғулланиш истаги бўлган 5 нафар хотин-қизга тикув машиналари топширилди. Дастур доирасида ички йўлларни шағаллаштириш, тоза ичимлик суви билан таъминлаш, симёғочлар, трансформатор ўрнатиш, суюлтирилган газ баллонларини етказиш ишлари бажарилди.  

Тадбир сўнггида тадбиркорлик йўналишида имтиёзли кредит олишга эҳтиёжи бўлган 25 нафар фуқароларнинг муаммоларини ҳал қилиш бўйича тегишли мутасаддиларга топшириқ ва кўрсатмалар берилди.