Заҳириддин Муҳаммад Бобур номидаги Андижон вилояти кутубхонасида Ўзбекистон Республикаси Халқ таълими вазири Шерзод Шерматов андижонлик фаол ва иқтидорли ўқувчилар билан учрашиб, мулоқот ўтказди.

Учрашувда мамлакатимизда ёшларнинг ўқиб, пухта билим олиши, ўз иқтидор ва салоҳиятларини юзага чиқаришлари учун барча шароитлар яратиб берилаётганлиги, таълим тизимидаги ислоҳотлар самаралари хусусида сўз юритилди.  

Умумтаълим мактабларининг муддатидан олдин талабаликка қабул қилинган битирувчилари, чет тилларини ўзлаштириш бўйича юқори натижаларга эришиб, халқаро сертификатларни қўлга киритган фаол ва аълочи ўқувчилари вазир билан мулоқотда бўлди.

Вазир Шерзод Шерматов андижонлик ёшларнинг илм олиш, ўз орзуларига эришиш йўлидаги шижоати, интилиши ниҳоятда баланд эканлигини айтиб, ана шу йўлда собитқадам бўлишлари кераклигини  алоҳида таъкидлади, ёшларга омадлар тилади.

Учрашув давомида таълим самарадорлиги, ўқувчилар фаоллигини ошириш бўйича ўзларининг таклиф, фикр ва мулоҳазалари билан фаол қатнашган бир гуруҳ ёшлар Халқ таълими вазирининг эсдалик совғалар билан тақдирланди.