Zahiriddin Muhammad Bobur nomidagi Andijon viloyati kutubxonasida O‘zbekiston Respublikasi Xalq ta’limi vaziri Sherzod Shermatov andijonlik faol va iqtidorli o‘quvchilar bilan uchrashib, muloqot o‘tkazdi.

Uchrashuvda mamlakatimizda yoshlarning o‘qib, puxta bilim olishi, o‘z iqtidor va salohiyatlarini yuzaga chiqarishlari uchun barcha sharoitlar yaratib berilayotganligi, ta’lim tizimidagi islohotlar samaralari xususida so‘z yuritildi.  

Umumta’lim maktablarining muddatidan oldin talabalikka qabul qilingan bitiruvchilari, chet tillarini o‘zlashtirish bo‘yicha yuqori natijalarga erishib, xalqaro sertifikatlarni qo‘lga kiritgan faol va a’lochi o‘quvchilari vazir bilan muloqotda bo‘ldi.

Vazir Sherzod Shermatov andijonlik yoshlarning ilm olish, o‘z orzulariga erishish yo‘lidagi shijoati, intilishi nihoyatda baland ekanligini aytib, ana shu yo‘lda sobitqadam bo‘lishlari kerakligini  alohida ta’kidladi, yoshlarga omadlar tiladi.

Uchrashuv davomida ta’lim samaradorligi, o‘quvchilar faolligini oshirish bo‘yicha o‘zlarining taklif, fikr va mulohazalari bilan faol qatnashgan bir guruh yoshlar Xalq ta’limi vazirining esdalik sovg‘alar bilan taqdirlandi.