Adliya organlari tizimida “Bepul huquqiy maslahat bilan har bir uyga” shiori ostida huquqiy targʻibot tadbirlari amalga oshirilmoqda.

Adliya organlari tizimida “Bepul huquqiy maslahat bilan har bir uyga” shiori ostida huquqiy targʻibot tadbirlari amalga oshirilmoqda. 

Ana shunday tadbirlardan biri Navoiy viloyati Navbahor tumani “Dul-dul” qishlogʻida boʻlib oʻtdi.

Muloqot jarayonida qishloq ahlisini qiynab kelayotgan elektr energiyasi, tabiiy gaz, ichimlik suvi masalalari yuzasidan murojaatlar qabul qilindi. Qishloq fuqarolarining soʻzlariga koʻra, hududda elektr energiyasi oʻtkazgichlari nosoz holatda, ular oʻz vaqtida qoʻlbola tayyorlangani bois bugungi kunda elektr simlari daraxt shoxlariga oʻralashib qolgan. Muloqotda fuqarolarning mehnat munosabatlari, yoshga doir pensiyaga chiqish va tugʻilganlik haqida guvohnoma olish bilan bogʻliq murojaatlari ham ish yurituvi uchun qabul qilindi.

Ozoda Islomova tugʻilganlik haqida guvohnoma olishda amaliy yordam soʻrab tuman adliya boʻlimiga murojaat qilgan. Gap shundaki, fuqaro joriy yilda yoshga doir pensiyaga chiqishi lozim. Ota-onasi oʻz vaqtida FHDYO boʻlimidan roʻyxatdan oʻtmasdan yashab kelgan. Keyinchalik ham turli oilaviy muammolar, eʼtiborsizlik sabab fuqaro shu kunga qadar tugʻilganlik haqidagi guvohnomani olmagan.

– 1986-yilda turmushga chiqqanman. Hozirda besh nafar farzandim bor. Davlat ishida ishlamaganman. Bugun oramizda boʻlmasada, umrimning 15 yilini nogiron farzandimga bagʻishladim. Turmush tashvishlari bilan boʻlib tugʻilganlik haqidagi guvohnoma hayotim davomida kerak boʻlishi mumkinligini oʻylab ham koʻrmaganman. Ayniqsa, u pensiyaga chiqishda juda kerak ekan, – deydi O.Islomova.

Ayni paytda fuqaro guvohnomasini olish, nafaqaga chiqish uchun hujjatlarini tayyorlamoqda.

Maʼlumot oʻrnida aytib oʻtish kerakki, shu kunga qadar loyiha doirasida adliya organlari tomonidan viloyatda 587 ta oila oʻrganildi. Fuqarolardan 77 ta murojaat qabul qilinib, shundan 51 tasi yoki 66 foizi ijobiy hal etildi. Qolgan murojaatlar oʻrganish jarayonida.