Ayni paytdagi karantin choralari kuchaytirilgan bir vaqtda Qashqadaryo viloyati Chiroqchi tumani hokimligi xayrli tashabbusni boshladi.

Yaʼni tuman aholisiga har turdagi oziq-ovqat mahsulotlarini arzonlashtirilgan narxlarda yetkazib berish maqsadida 15 ta “Damas” rusumli avtomashinalarda koʻchma savdo yarmarkalari tashkil etildi.

Ushbu koʻchma savdo yarmarkalari tumandagi 86 ta mahalla fuqarolar yigʻinlarida tashkil etiladi.

Koronavirus pandemiyasi vaqtida joriy etilgan karantin qoidalaridan biri bu oʻz-oʻzini yakkalash, maqsadsiz koʻchaga chiqmaslik, eng asosiysi osoyishtalikni saqlashdir. Bunday sharoitda fuqarolarning oziq-ovqat mahsulotlariga boʻlgan talabini qondirish birinchi galdagi vazifalardan biriga aylanishi shubhasiz.

Koʻchma savdo doʻkonlari aholi uchun kerakli boʻlgan oziq-ovqat mahsulotlari, ayniqsa, shu kunlarda talab yuqori boʻlgan mahsulotlar bilan taʼminlangan. Albatta, hudud aholisi yaratilayotgan bu qulayliklardan mamnun.