O‘zbekiston iqtisodiyot vaziri Botir Xo‘jaev mamlakatda besh yillik «Obod mahalla» dasturi qabul qilinishi, u shaharlarning qiyofasini o‘zgartirishi kerakligini ma’lum qildi.

"Yaqin kunlar ichida yangi dasturni ko‘rasizlar. U "Obod mahalla" deb ataladi", — dedi Xo‘jaev Toshkent davlat iqtisodiyot universitetidagi xalqaro konferentsiyada.

Vazir dasturga xarajatlar 12—15 trillion so‘mga baholanayotganini ta’kidlab o‘tdi.

Dastur mamlakat sanoat ishlab chiqarishining qariyb 54 foizini tashkil etayotgan asosiy 30 shaharning «tashqi qiyofasini yangilash»ga qaratilgan.

"Qabul qilinadigan tadbirlar aholi turmush darajasini yuksaltirishga xizmat qilishi kerak", — dedi Xo‘jaev.

O‘zbekistonda «Obod qishloq» nomi ostida shu kabi dastur amalga oshirilmoqda. U uzoq aholi punktlaridagi hayot sharoitlarini yaxshilashga qaratilgan. Masalan, 2018 yilda mamlakatning 174 ta tumanidagi 368 mahalla hududini kompleks yangilash bo‘yicha chora-tadbirlar nazarda tutilgan.