Qoraqalpog‘istonda “Jonajon yurtim obodligiga o‘z hissamni qo‘shaman” shiori ostida obodonlashtirish ishlari boshlandi. Unga ko‘ra, barcha mahallalardagi ko‘chalarni, xonadonlarni obodonlashtirishga qaratilgan keng ko‘lamli ishlar amalga oshiriladi.

Qoraqalpog‘iston Respublikasi Vazirlar Kengashi axborot xizmati ma’lumotiga ko‘ra “Obod xonadon”, “Obod ko‘cha” va “Obod mahalla” tadbirlari doirasida fuqarolar yig‘inlari hududida istiqomat qilayotgan yordamga muhtoj oilalarning uy-joylari ta’mirlanadi, mavjud muammolar bartaraf etiladi.

Ushbu tadbirlar ijrosini ta’minlash uchun hududlarda shtab hamda ishchi guruh tuzilgan. Shahar va tumanlarga mutaxassislar mas’ul qilib belgilangan.

Guruh a’zolariga barcha mahallalarni obodonlashtirish maqsadida iyunь-iyulь-avgust oylarida aholi o‘rtasida targ‘ibot va amaliy choralarni amalga oshirishga qaratilgan vazifalar belgilangan. Hokim o‘rinbosarlari rahbarligidagi shtab a’zolari mahallalardagi xonadonlarni obod qilish bo‘yicha rejalari ishlab chiqilgan. 

Eslatib o‘tamiz, Prezidentimiz joriy yil 5-6-iyunь kunlari Farg‘ona viloyatiga safari davomida mahallalar obodligi, ko‘chalar va xonadonlarning tozaligini ta’minlash, aholining yordamga muhtoj qatlamiga har tomonlama yordam berish ishlarini yanada ko‘chaytirish bo‘yicha vazifalarni belgilab bergan edi. Shu topshiriqlar ijrosi bo‘yicha hozirda hududda keng ko‘lamli ishlar boshlab yuborildi.