Yoki tadbirkorlik kayfiyati bor joyda kambagʻallik boʻlmaydi!

Ehtiyojmand oilalarga madad boʻlish, ularga imkon qadar yordam berishga harakat qilyapmiz. Ammo xalqimiz “Qoʻldan berganga qush toʻymaydi”, degan naqlni bejiz aytmagan.

Prezidentimiz Shavkat Mirziyoyev “Pandemiya tufayli kambagʻal aholi va ishsizlar sonining oshishi, oilalar daromadining kamayishi tayin. Shu sababli qisqa fursatda yangi ish oʻrinlari yaratish uchun kichik biznes va oilaviy tadbirkorlikni faol qoʻllab-quvvatlash zarur”, deb alohida taʼkidladi.

Davlatimiz rahbari hozirgi murakkab vaziyatdan chiqishning chorasi sifatida kichik biznes va oilaviy tadbirkorlikni faol qoʻllab-quvvatlash boʻyicha topshiriqlar ham berdi.

Darhaqiqat, daromad manbasi, yaʼni kichik boʻlsa ham tadbirkorlik qila olgan oilaning roʻzgʻoriga baraka kirishi shubhasiz.

Bu ezgu maqsadni amalga oshirish uchun Namangan viloyatida amaliy ishlar boshlab yuborildi. Ehtiyojmand oilalar roʻyxati shakllantirilib, ularga oilaviy biznes boshlashiga koʻmaklashilmoqda.

Xususan, Pop tumanida oʻnta xonadonga tovuq va quyonlartarqatildi. Shu bilan birga, Namangan viloyati Pop tumanida kam taʼminlangan oʻnta oilaga ikkitadan, jami 20 quti asalari uyasi tuhfa etdik. Bu oilalar bir haftadan keyin tayyor asal olishi mumkin.

Ming dardga davo bu mahsulot ularning roʻzgʻorini obod qiladi. Mutaxassislar fikriga koʻra, bir quti asalari uyasidan 1 million soʻmgacha daromad topish mumkin.

Umid qilamizki, bu oilalar tovuq va quyonlar sonini, asalari qutilarilarni yana-da koʻpaytirib, oʻz biznesini rivojlantiradi. Bundan tashqari,9 nafar ishsiz fuqaroga “Pop baraka dehqon bozori” savdo rastalaridan savdo-sotiq qilish uchun joy ajratib berildi. Poplik tadbirkorlarga esa hozirgi murakkab vaziyat hisobga olinib, bozor atrofidagi yuzga yaqin savdo doʻkoni uch oyga ijara haqisiz faoliyat yuritish uchun topshirildi.

Bu imkoniyatlardan foydalayotan yurtdoshlarimiz kelgusida oʻz biznesiga ega tadbirkorlarga aylanadi. Tadbirkorlik kayfiyati bor joyda esa kambagʻallik boʻlmaydi.