Karantin munosabati bilan qiynalib qolgan ehtiyojmand fuqarolarni ijtimoiy qo‘llab-quvvatlashga qaratilgan “Saxovat va ko‘mak” umumxalq harakatiga nafaqat tadbirkorlar, balki prokuratura organlari ham hissa qo‘shmoqda.

Farg‘ona viloyati Uchko‘prik tumani 2-sektor shtabida tuman prokurori A.To‘xtasinov boshchiligida maxsus shtab tashkil qilindi.

Shtabdagi ishchi guruh a’zolari tomonidan hududdagi ehtiyojmandlar o‘rganib chiqilganda yordam zarur bo‘lgan 434 oila borligi aniqlandi.

Kuni kecha ushbu oilalardan 125 tasiga 89 million so‘mlik 15 turdagi oziq-ovqat mahsulotlari tarqatildi va bu jarayon davom etmoqda. 

Bundan tashqari, Agrobank, Tomorqa xizmati jamiyati bilan hamkorlikda aholiga tomorqalarini rivojlantirishga ko‘maklashish ishlari boshlab yuborildi. Shu maqsadda 13 million so‘mlik turli xil sabzavot ko‘chatlari tarqatildi. Shu bilan birga, band bo‘lmagan fuqarolarni ishga joylashtirish bo‘yicha ham choralar ko‘rilmoqda.