Карантин муносабати билан қийналиб қолган эҳтиёжманд фуқароларни ижтимоий қўллаб-қувватлашга қаратилган “Саховат ва кўмак” умумхалқ ҳаракатига нафақат тадбиркорлар, балки прокуратура органлари ҳам ҳисса қўшмоқда.

Фарғона вилояти Учкўприк тумани 2-сектор штабида туман прокурори А.Тўхтасинов бошчилигида махсус штаб ташкил қилинди.

Штабдаги ишчи гуруҳ аъзолари томонидан ҳудуддаги эҳтиёжмандлар ўрганиб чиқилганда ёрдам зарур бўлган 434 оила борлиги аниқланди.

Куни кеча ушбу оилалардан 125 тасига 89 миллион сўмлик 15 турдаги озиқ-овқат маҳсулотлари тарқатилди ва бу жараён давом этмоқда. 

Бундан ташқари, Агробанк, Томорқа хизмати жамияти билан ҳамкорликда аҳолига томорқаларини ривожлантиришга кўмаклашиш ишлари бошлаб юборилди. Шу мақсадда 13 миллион сўмлик турли хил сабзавот кўчатлари тарқатилди. Шу билан бирга, банд бўлмаган фуқароларни ишга жойлаштириш бўйича ҳам чоралар кўрилмоқда.