Fargʻona viloyati IIB yoʻl harakati xavfsizligi boshqarmasi tomonidan Xalqaro xotin-qizlar kuni munosabati bilan ayollarga bayram sovgʻalari va gullar ulashildi.

Erta tongdan boshlangan bu oʻziga xos tadbirning maqsadi goʻzal va latofatli opa-singillarimizning koʻngliga bahoriy iliqlik, bayramona shukuh olib kirishga qaratildi.

- Soʻlim bahor faslining goʻzal bayramlaridan biri boʻlmish 8-mart – Xalqaro xotin-qizlar bayrami bilan siz, aziz ayol-qizlarimizni chin qalbimizdan tabriklaymiz. Yoʻlingiz bexatar boʻlsin. Farzandlaringiz va yaqinlaringiz baxtiga salomat boʻling, – deya yoʻl harakati inspektorlari ayol haydovchilarga gullar tuhfa etishdi.

Har bir xonadonda baxt, tinchlik-totuvlik, xotirjamlik hukmron boʻlishida, aziz ayollarning oʻrni katta. Ular oʻz xonadonining farishtasi va bekasi, sevimli va vafodor yor, mehribon ona.

Tadbir doirasida nafaqat ayol haydovchilar, balki oʻz yumushlari bilan koʻchaga otlangan, yurtimiz obodligiga hissa qoʻshayotgan xotin-qizlar ham eʼtibordan chetda qolmadi.

Bir soʻz bilan aytganda, yoʻlda uchragan har bir bayram qahramoniga gullar tutildi.