Фарғона вилояти ИИБ йўл ҳаракати хавфсизлиги бошқармаси томонидан Халқаро хотин-қизлар куни муносабати билан аёлларга байрам совғалари ва гуллар улашилди.

Эрта тонгдан бошланган бу ўзига хос тадбирнинг мақсади гўзал ва латофатли опа-сингилларимизнинг кўнглига баҳорий илиқлик, байрамона шукуҳ олиб киришга қаратилди.

- Сўлим баҳор фаслининг гўзал байрамларидан бири бўлмиш 8 март – Халқаро хотин-қизлар байрами билан сиз, азиз аёл-қизларимизни чин қалбимиздан табриклаймиз. Йўлингиз бехатар бўлсин. Фарзандларингиз ва яқинларингиз бахтига саломат бўлинг, – дея йўл ҳаракати инспекторлари аёл ҳайдовчиларга гуллар туҳфа этишди.

Ҳар бир хонадонда бахт, тинчлик-тотувлик, хотиржамлик ҳукмрон бўлишида, азиз аёлларнинг ўрни катта. Улар ўз хонадонининг фариштаси ва бекаси, севимли ва вафодор ёр, меҳрибон она.

Тадбир доирасида нафақат аёл ҳайдовчилар, балки ўз юмушлари билан кўчага отланган, юртимиз ободлигига ҳисса қўшаётган хотин-қизлар ҳам эътибордан четда қолмади.

Бир сўз билан айтганда, йўлда учраган ҳар бир байрам қаҳрамонига гуллар тутилди.