Sayyor qabullarda fuqarolar odatda mas'ul rahbarlar oldiga qish mavsumida ko‘mir mahsuloti yetkazib berish, tadbirkorlik, yer-joy, mablag‘lar ajratish hamda ko‘chalarga tungi yoritish chiroqlarini o‘rnatish, ichimlik suvi kabi ijtimoiy muammolarni ko‘ndalang qilishadi.

Navoiy viloyat IIB boshlig‘i, polkovnik R.Tursunovning Nurota tumanidagi Xayrobod qishlog‘i aholisi bilan sayyor qabulida ham shular haqida gap borgan. Mamlakatimizda aholining ijtimoiy himoyasi, ular murojaatlarida aks etgan muammolarni hal etishga qaratilgan amaliy ishlarga yuzasidan chiqish qilgan 3-sektor rahbariga fuqarolar o‘zlarini qiynab kelayotgan muammolarni bayon qilishgan. Muammolar asosan ichki yo‘llarni ta'mirlash, ichimlik suvi, elektr energiyasi ta'minoti bilan bog‘liq bo‘lgan.

Sektor rahbari va ishchi guruhi a'zolari aytilgan masalalarning ayrimlari bo‘yicha tegishli vazifalar belgilab olgan bo‘lsa, aksariyati joyida bartaraf etilgan.

Ana shunday sayyor qabullardan biri viloyat markazi Navoiy shahridan qariyb 350 kilometr olisda joylashgan Uchquduq tumanining «Yo‘lchilar» ovul fuqarolar yig‘inida bo‘lib o‘tgan.

Ishchi guruh a'zolari hududdagi maktabgacha ta'lim tashkilotlarida bo‘lib, ularning qishki mavsumga shayligi, bolalarga yaratilgan sharoitlar bilan yaqindan tanishdilar.

Navoiy viloyati IIB axborot xizmatining yozishicha, bu kabi sayyor qabullar ijtimoiy muammolarni bartaraf etish barobarida, ichki ishlar idoralari xodimlarining xalq bilan birdamligini yanada mustahkamlashga xizmat qiladi.