Navoiy viloyati Zarafshon shahrida Davlatimiz rahbarining topshirigʻiga asosan, hududlarda aholi bilan bevosita va toʻgʻridan-toʻgʻri muloqot qilish, ularni qiynab kelayotgan muammolarni joyida hal etish maqsadida Oʻzbekiston Respublikasi Prezidenti maslahatchisi T.Xudoybergenov rahbarligida ishchi guruh sayyor qabul oʻtmoqda.

Zarafshon shahri, Uchquduq va Tomdi tumanlari aholisi ishtirok etayotgan uchrashuvda fuqarolarning ijtimoiy, kommunal va boshqa muammolari muhokama etildi.

Respublikaning 14 ta vazirlik va qoʻmitalari mutasaddilari alohida holda fuqarolarni qabul qildi.

Xususan, Zarafshon shahri 2 xonali uy olib, kadastr bilan bogʻliq muammolariga yechim istab kelgan Dildor Xolmurodovaning murojaati joyida hal etilib, kadastr hujjatlari tayyorlab berildi.

– Ilgari bunday masalalarni oylab kutishga toʻgʻri kelardi, – deydi D.Xolmurodova. – Baʼzida idorama idora sarson boʻlardik. Mutasaddilarga ming rahmat, mening murojaatim 15 daqiqada hal boʻldi. Tegishli mutasaddilar masalaga masʼuliyat bilan yondashib, men kabi fuqarolarning ogʻiri yengil qilayotganidan mamnunman.